ගෝලීය වෙළෙඳපොළ උඩුයටිකුරු කළ ඇමරිකානු ජනාධිපති ඩොනල්ඩ් ට්‍රම්ප්ගේ තීරුබදු ප්‍රතිපත්තියට ප්‍රතිචාර දක්වමින් අප්‍රේල් 10වනදා සිට ක්‍රියාත්මක වන පරිදි ඇමරිකාවෙන් ගෙන්වනු ලබන සියලු භාණ්ඩ සඳහා 34%ක අතිරේක තීරුබදු පැනවීමට චීනය පියවර ගෙන තිබෙනවා.
විදෙස් මාධ්‍ය වාර්තා කළේ ඩොනල්ඩ් ට්‍රම්ප් තීරුබදු ඉහළ දැමූ රටවල් ලැයිස්තුවට අනුව චීනයට පනවනු ලැබූ තීරුබදු ප්‍රමාණය ද 34% ක් වන අතර, ලෝක ආර්ථිකයේ බලවත්ම රටවල් ද්විත්වය අතර උද්ගත වූ මේ වෙළෙඳ යුද්ධය ගෝලීය ආර්ථික අවපාතයක් ඇති කිරීමේ අවදානමක් මතු කර ඇති බවයි.
ඇමරිකානු ජනාධිපතිවරයා චීනයට පැනවූ නව තීරුබදු හේතුවෙන් එරට ඇතැම් භාණ්ඩවලට පනවනු ලබන තීරුබද්ද 79% දක්වා ඉහළ යනු ඇතිබව ලෝක ආර්ථික විශේෂඥයන් අනාවැකි පළ කර ඇති බව විදෙස් මාධ්‍ය වැඩිදුරටත් සඳහන් කළා.